Knattspyrnumenn ársins úr Eyjum, hvað með framtíðina?

Það var gaman af því að knattspyrnumenn ársins, bæði í karla og kvennaflokki skyldu vera Eyjamenn. Hermann átti nafnbótina svo sannarlega skilið, enda búinn að standa sig gríðarlega vel, hvort sem það er með Charlton/Portsmouth eða íslenska landsliðinu. Sannarlega fyrirmynd. Margrét Lára ber höfuð og herðar yfir íslenskar knattspyrnukonur, slær markametið tvö ár í röð í efstu deild og hefur raðað inn mörkum með landsliðinu.

Ég held að ég sé eins og margir aðrir Eyjamenn. Við fylgjumst með hvernig „okkar fólki“ gengur þó þau séu farin í annað lið.  Við erum stolt af árangri þeirra. Jafnvel montin.

Ég tók að gamni mínu saman hvaða leikmenn hafa spilað A-landsleiki frá 1980 og farið út í atvinnumennsku. ÍBV á þar sjö leikmenn. Eru í þriðja sæti yfir liðin. Aðeins ÍA og KR eiga fleiri atvinnumenn á þessu tímabili.  Valur á jafnmarga en fyrir neðan ÍBV eru lið eins og Fram, Keflavík, Breiðablik, FH, Fylkir, Grindavík, Stjarnan, Víkingur og Þór Akureyri.

Þessir sjö leikmenn eru: Títtnefndur Hermann Hreiðarsson, Gunnar Heiðar Þorvaldsson, Tryggvi Guðmundsson, Hlynur Stefánsson, Örn Óskarsson, Ívar Ingimarsson og Sverrir Sverrisson sem var áður með Leiftri.  Svo fór Birkir Kristinsson í atvinnumennsku frá Fram en hann ólst hér upp og fékk sitt knattspyrnulega uppeldi í Eyjum.  Fleiri snillingar hafa komið frá Eyjum og of langt mál að telja það upp hér en mergur málsins er sá að það hefur verið gott að fá sitt íþróttauppeldi í Eyjum.

Nú eru uppi hugmyndir um að fresta byggingu knattspyrnuhúss. Fresta því um eitt ár og fá fjármagn inn í ÍBV til að mæta erfiðum rekstri.  Það er vitað mál að reksturinn er erfiður og ekkert einhverju einu um að kenna. Óþarfi að fara í hártoganir um slíkt.

Ég hef fulla samúð með stjórnarmönnum hjá ÍBV sem þurfa að mæta þessum rekstri og finna leiðir en mín skoðun er sú að þetta er ekki rétta leiðin. Knattspyrnuhúsið á að rísa.

Aðstaðan er gríðarlega mikilvæg.  Þegar Hemmi Hreiðars, Tryggvi, Venni, Bjarnólfur og fleiri snillingar voru að alast upp í Eyjum litu önnur lið öfundaraugum til Eyja. Hér voru fjórir grasvellir og aðstaðan sú besta á landinu.  Síðan höfum við dregist aftur úr. Knattspyrnuhús hafa risið víða og öll lið utan tvö að ég held í efstu tveimur deildunum á Íslandi (24 lið) hafa æfingaaðstöðu í knattspyrnuhúsum.

Við sitjum orðið eftir. Það er staðreynd.  Hemmi Hreiðars framtíðarinnar, Margrét Lára næstu kynslóðar hafa ekki aðstöðu til að taka framförum líkt og jafnaldrar þeirra. Auðvitað stendur ekki allt og fellur með húsinu en það hefur mikil áhrif.  Krakkar hafa aðstöðu til að vera í handbolta og körfubolta allt árið. Ekki fótbolta. Í dag eru fótboltaæfingar allan ársins hring. 

Umræðan hefur verið fjörug á heimasíðu ÍBV og þar sýnist sitt hverjum. Eins var góður pistill frá Kela, en hann tók skóflustunguna að nýju húsi síðasta haust.  Sú athöfn vakti athygli og menn urðu bjartsýnir fyrir hönd knattspyrnunnar.

Knattspyrnuhúsið er ekki byggt fyrir meistaraflokk. Húsið er fyrst og fremst byggt fyrir börnin okkar. Þar eru Hemmi og Margrét Lára framtíðarinnar.

 (myndina fékk ég að láni hjá fotbolti.net)

 

Athugasemdir

[Árni Sigurður Pétursson, 19.12.2007 kl. 16:38]

svolítið merkilegt að þú skulir nefna Hemma hreiðars og margréti láru

þau 2, já ásamt öðrum eyjamönnum sem að hafa gert það gott í fótbolta undanfarin ár, æfðu  og ólust upp nefnilega einmitt ekki í svona húsi, heldur við (basicly) þær aðstæður sem að eru hérna í dag.

þannig að það þarf nú ekki endilega hús til þess.

en reyndar er ég sammála því að byggja hús, en mótfallinn því að byggja hálft hús, gera þetta bara alminnilega frá byrjun en ekki að vera að einhverju hálfkáki 

[Sigþóra Guðmundsdóttir, 19.12.2007 kl. 17:13]

En jafnaldrar Hemma og Margrétar Láru annars staðar á landinu æfðu heldur ekki inni í svona húsum!

[Gísli Foster Hjartarson, 20.12.2007 kl. 08:20]

Vantar ekki Sigurlás Þorleifsson fyrrum leikmann sænska liðsisns Vasalund inn í þessa upptalningu hjá þér, sé ekki betur, hvort hann fór beint héðan man ég ekki, en hann lék klárlega erlendis og með landsliðinu. Bjarnólfur spilaði ekki með A-landsliðinu en helling með öllum yngri landsliðum. Á ekki Venni að baki einhverja A-landsleiki, hann fór nú héðan til Stuttgart á sínum tíma.

Húsið á að rísa, og það sem fyrst,  annað væri tóm tjara

[Sigursveinn , 20.12.2007 kl. 08:37]

Sæll Gilli. Það er hárrétt hjá þér að það vantar Sigurlás inn í þetta. Fór einfaldlega fram hjá mér þar sem hann spilaði sinn fyrsta landsleik 1979.  Tók frá 1980 en vissulega hefði hann átt að vera með, enda fór hann erlendis eftir það.  Eins með Venna, hann á að baki 6 A-landsleiki. Þannig að það eru níu Eyjamenn.