Fyrning fyrningarleiðarinnar

Ég átti því miður ekki heimagengt á fundinn í gærkvöldi en þvílíkur fjöldi af bílum sem lágu út um allt í kringum Höllina.  Það voru ekki bara "kvótagreifar" sem sátu þennan fund.  Nei, það var hinn almenni Eyjamaður sem óttast afleiðingar fyrningarleiðarinnar fyrir samfélagið.  

Sama hvað menn segja um kvótakerfið sem slíkt er ljóst að útgerðarmenn í Eyjum tóku flestir  þá ákvörðun að vinna með  kerfinu en ekki á móti því.  Menn fjárfestu, endurskipulögðu og í stað aflamagns fóru menn að horfa í gæði.  Því þeir vissu að ekki var hægt að veiða jafn mikið og áður og því þurfti hærra verð fyrir afurðina.  

Þetta er líklega eitt það jákvæðasta við kvótakerfið.  Menn fóru að hugsa öðruvísi.  Gæðamálin voru tekin föstum tökum og úr varð að íslenskur fiskur var eftirsóttur erlendis sem gæðavara.  Skipin voru nútímavædd og einnig fiskvinnslan í landi.  Menn tala núna mikið um skuldastöðu sjávarútvegsins.  Enginn talar um hvað þessi hluti hefur kostað útgerðir á Íslandi.  Nei, það eru allir að horfa á svörtu sauðina sem löbbuðu út úr greininni.  Ábyrgðarlausir með öllu og fjárfestu í öðru, til dæmis bönkunum. 

Menn verða að muna út af hverju kvótakerfið var sett á á sínum tíma. 

Við vitum það hér í Eyjum að það eru útgerðir hér sem voru ekki með sterka kvótastöðu í upphafi en hafa hægt og bítandi fjárfest í frekari aflaheimildum og þannig stækkað sitt fyrirtæki.  Eðlilegt er það ekki?  Að mati margra þá er þetta eðlilegt í öllum öðrum atvinnugreinum en sjávarútvegi.  

Um þetta er ekki rætt.  

Það er auðvelt að afgreiða fundinn í gær sem eitt allsherjar samsæri útgerðarmanna til að koma sínum sjónarmiðum á framfæri.  Að þeir jafnvel kúgi sjómenn til að mæta á slíka fundi eins og ég heyrði á Bylgjunni í morgun.  Bara það að hleypa manni eins og þessum Eiríki í útvarp er fyrir neðan allar hellur.  Hann hafði ekkert fram að færa nema gífuryrði.  Ömurlegt að hlusta á svona álf þegar umræðan á að vera á hærra plani.  Staðreyndin er sú að 10% Eyjamanna mættu á fundinn í gær. Það er drullugóð mæting svo ekki sé meira sagt.

Hugsa sér að íslenska þjóðin hafnaði Frjálslynda flokknum í síðustu kosningum.  Þeir þurrkuðust út. Þeirra aðal baráttumál var afnám kvótakerfisins.  Kjósendur voru á öðru máli.  Samt sem áður er formaður þess flokks nú valdamesti maður í sjávarútvegsráðuneytinu. Skrýtið þetta lýðræði!

Finnst dapurt að hugsa til þess að það séu jafnvel menn ættaðir úr Eyjum og öðrum sterkum útvegsbæjum sem sitja á þingi og berjast fyrir þessum breytingum. 

Annars er líka skondið hvernig þessi umræða hefur verið. Eyjaflotinn siglir í land!  Hér eru flestir bátar í landi á fimmtudögum, enda löndunardagur!

 

 

 

 

Þess krafist að stjórnvöld falli frá fyrningarleið

Athugasemdir

[þorvaldur Hermannsson, 22.1.2010 kl. 10:38]

Það er merkilegt hvað forréttinda hóparnir geta haft mikil áhrif á hinn almenna mann,þeir geta leitt þá áfram eins og blinda kettlinga.kv

[Gísli Ingvarsson, 22.1.2010 kl. 11:18]

Sammála síðasta ræðumanni!

[Sigurjón Þórðarson, 22.1.2010 kl. 11:21]

Til upprifjunar, þá var kvótakerfið sett á til bráðabirgða í upphafi til þess að byggja upp þorskstofninn en það hefur algerlega mistekist þorskveiðin nú er 150 þúsund tonn en fyrir daga kerfisins var aflinn þrisvar sinnum meiri. Frjálslyndi flokkurinn hefur ekki talað fyrir fyrningu aflaheimilda heldur auknum og auknu frelsi til veiða.  Sömuleiðis að taka á braski og rugli í atvinnugreininni. 

Það er líka óhætt að rifja það upp að fyrir örfáum árum var atvinnulíf Eyja í uppnámi vegna þess Brim var við það að ná undirtökunum í Vinnslustöðinni.

Það væri miklu nær fyrir Eyjamenn að hafa áhyggjur af skuldastöðu útgerðarmannanna í Eyjum sem sumir hverjir eru búnir að haga sér eins og erkifífl í skuldsetningu auðlindarinnar með fábjánalegum fjárfestingum og flottræfilshætti en breytingum á vonlausu fisveiðistjórnunarkerfi sem skilar færri og færri fiskum á land. 

[Sigursveinn , 22.1.2010 kl. 12:15]

Sæll Sigurjón.  Var ekki einmitt eitt af grundvallaratriðum þegar kvótakerfið var sett á að koma í veg fyrir ofveiði?  Það er eitt af því sem var orðið vandamál vegna stækkandi skipa til að mynda. Það eru vankantar á kvótakerfinu en rétta leiðin er ekki þessi umbylting sem nú er boðuð.  Sem betur fer héldu Eyjamenn völdum í Vinnslustöðinni.  Það er alveg rétt að menn óttuðust það virkilega ef Brim hefði eignast meirihluta í fyrirtækinu.  En er það ekki eins með þessa atvinnugrein eins og aðrar.  Fyrirtæki ganga kaupum og sölum ?  Af hverju á það að vera eitthvað öðruvísi í sjávarútvegnum? 

Alltaf gott að fá málefnalega gagnrýni á það sem maður skrifar og vill beina því til þeirra sem áður hafa svarað að taka þátt í umræðunn.  Ef menn eru rökþrota grípa þeir oft til upphrópanna af þessu tagi.  

[Sigurjón Þórðarson, 22.1.2010 kl. 14:28]

Sigursveinn skipastóllin hefur ekkki stækkað og sókn minnkað. Staðreyndirnar tala sínum máli þorskveiðin núna er um þriðjungurinn af því sem hún var frá stríðslokum þar til upptöku kvótakerfisins sem átti vel að merkja að stækka stofninn.  Veiðin er meira að segja einungis helmingurinn af því sem þorskveiðin var frá fyrra stríði og til 1950.

Niðurstaðan hlýtur að vera að kerfið hafi algerlega brugðist markmiðum sínum.