Búinn að moka mig út á götu en ...

...lengra kemst ég nú ekki. 

Selma Björt ákvað að fara út að leika sér en það entist ekki lengi enda skaflarnir fyrir utan tvöföld stærð hennar.

 

 

Innilokaður í efri byggð

Ja hérna...

Einn af kostum þess að búa í Vestmannaeyjum er hversu snjólétt er hér yfir vetrarmánuðina. Undantekningin sem sannar regluna er akkúrat núna.  Þvílíkt og annað eins.  Hér sitjum við fjölskyldan innilokuð upp á Smáragötu og komumst ekki neitt.

Vindáttin er þannig að það fýkur upp að hurðinni.  Á tröppunum hér fyrir utan er hátt í tveggja metra hár skafli.  Það hefur ekki sést bíll á ferð hér í efri byggð í allan dag, enda kæmist sá bíll ekki langt. Lánsbíllinn sem við erum á er kominn á kaf. 

Sá fáheyrði atburður gerðist að messufall varð í Landakirkju.  Það tekst ekki að koma fólki til og frá vinnu á Sjúkrahúsinu.  Björgunarfélagið kemst ekki leiðar sinnar. 

Og enn er að snjóa. 

Í ágætu bloggi Einars Sveinbjörnssonar veðurfræðings síðan í morgun kemur fram að Óskar og félagar upp á Stórhöfða hafi mælt 50 sm snjódýpt klukkan 9 í morgun. Það hefur snjóað mikið síðan...

Hvar endar þetta eiginlega...

Myndin var tekin út um útidyrnar hjá okkur, lengra komst ég ekki.

Eitt gjald lækkar, annað hækkar

Síðan bæjarstjórn Vestmannaeyja gerði þau regin mistök að afsala sér neitunarvaldi vegna hækkunar fargjalda Herjólfs hafa fargjöldin tvívegis verið hækkuð.  Nú kostar 17.500 krónur 40 eininga kort og nemur hækkunin núna 8%.

Þessar fréttir bárust okkur í auglýsingu í Fréttum í síðustu viku. Á forsíðunni var frétt um yfirvofandi loðnuveiðibann sem varð að veruleika sama dag.

Í þau tvö skipti sem Eimskip hefur ákveðið að hækka fargjöldin í Herjólf hefur borist tilkynning frá rekstraraðilum Hvalfjarðargangana um lækkun.  Í fyrra skiptið úr 1000 krónum í 900 krónur og nú í 800 krónur.  

Flott mál að hægt sé að bjóða upp á lægri gjöld í Hvalfjarðargöngin. Sumir tala fyrir því að hafa þau gjaldfrjáls.  Hluti af þjóðvegakerfinu segja menn og hrópa réttlæti fyrir íbúa Vesturlands. 

Þarf ekki að fara fram umræða um þjóðvegakerfi okkar Íslendinga og hvað tilheyrir því og hvað ekki?  Er Hvalfjörðurinn enn skilgreindur sem hluti af Þjóðvegi nr. 1 eða hafa Hvalfjarðargöngin verið skrifuð þar inn.  Hreinlega veit það ekki.

En ég veit það þó að staðfesting hefur borist um að Herjólfur er hluti af þjóðvegakerfi okkar Íslendinga. Samt er ekkert mál að hækka fargjöldin á þá leið.  Ekki einn þingmaður hefur opnað á sér kjaftinn og bölsóttast yfir þessari hækkun.  Varaþingmaður Frjálslyndra skammar bæjarstjórann í Eyjum !!

Hækkun fargjalda + loðnubrestur = áframhaldandi fólksflótti frá eyjunni fögru

Kannski spurning um að kíkja aðeins nánar á hugmyndina um fríríkið ? 

Þá legg ég til að við gerum Braga Ólafs að forseta.  

Veggjald í Hvalfjarðargöngum lækkar

Pistill ráðherrans hrós til Gísla Marteins

Mikið er rætt um pistil Össurar Skarphéðinssonar ráðherra frá því í fyrrinótt þar sem hann fer heldur betur hörðum orðum um Gísla Martein Baldursson.  Hann spáir honum ekki langlífi í pólitík en ég held að þetta sé meiri óskhyggja en spádómar hjá ráðherranum.

Ég man vel eftir umræðunni þegar Össur tókst á við Ingibjörgu Sólrúnu um formannsstólinn í Samfylkingunni.  Þá voru sjálfstæðismenn duglegir að mæra Össur, hrósa honum fyrir allt og allt á meðan gagnrýnin á Ingibjörgu var í öllum hornum.  

Ingibjörg var álitin hættulegri andstæðingur.

Ég held að Össur líti svipuðum augum á Gísla Martein. Nú þegar tími Villa er liðinn hefst baráttan um leiðtogasætið í borginni. Baráttan stendur á milli nokkurra og þar á meðal Gísla Marteins.

Össur álítur hann hættulegasta andstæðinginn...

Varðandi tímasetninguna á pistlinum verð ég að segja það að mér finnst ekkert að því að hann skrifi á nóttunni. Sjálfur hef ég lesið marga skemmtilega pistla eftir karlinn sem skrifaðar voru langt eftir miðnætti. 

 

Sami búningur, allt annað lið

Hvernig er hægt að tapa fyrir Barnsley á Anfield á laugardaginn og vinna svo ítölsku meistarana í Inter þremur dögum seinna afar sannfærandi?  Jú, þetta getur Liverpool undir stjórn Rafa Benitez.  Vegna þess að fókus hans er nánast algjörlega á árangur í Meistaradeild Evrópu.

Ég horfði á báða þessa leiki og þó að miklu leyti sömu leikmenn hafi verið inná var eins og allt annað lið væri að keppa.  Reina var reyndar í markinu núna en Itjande á laugardaginn. Reyndi aldrei á Reina í gær.  

Munurinn lá hins vegar í þremur leikmönnum, Steven Gerrard, Javier Mascherano og Fernando Torres.

Inter er með 11 stiga forskot í ítölsku deildinni, hafa ekki tapað þar í tvö eða þrjú ár. Þeir eru semsagt með langbesta lið Ítala (reyndar bara einn Ítali í liðinu í gær og sá var rekinn út af eftir 30 mínútna leik)

Sýnir þetta hugarfar leikmanna gagnvart andstæðingunum?

Eða sýnir þetta hvar ástríða Benitez er?

Eða er Ítalska deildin bara svona léleg?

 

 

Rafa Benitez

Huginn Man.Utd. aðdáandi rukkar mig um Liverpool færslu í tilefni gærdagsins. Þegar Liverpool var slegið út úr bikarkeppninni ensku af Barnsley !!!

Algjört klúður svo ekki sé meira sagt.  Spurningin er hvort Rafael Benitez sé ekki kominn á leiðarenda með Liverpool liðið. Ég hef áður rifjað upp samanburð á gengi Benitez og fyrri stjóra, Houllier og sá samanburður var Benitez ekki hagstæður.

Sjálfur segir hann að árangur hans sé góður með félagið. Liðið hafi unnið meistaradeildina, FA bikarinn einu sinni og svo góðgerðarskjöldinn og Stórbikar Evrópu. Tveir síðastnefndu "titlarnir" koma með sigri í einum leik.

Auðvitað var frábært að vinna Meistaradeildina árið 2005 en hversu lengi getur hann lifað á því?

Árangur hans í deildinni er langt fyrir neðan væntingar. Liðið er að berjast við nágrannnana í Everton um fjórða sætið.  Einu sinni komst liðið í Meistaradeildina með því að enda í 5. sæti í deildinni. Er þetta eitthvað sem aðdáendur Liverpool sætta sig við?

Ekki ég

Ég vill nýjan stjóra og það strax 

Auglýsing

Er fólk í alvöru að fetta fingur út í auglýsingaborðann hér við hliðina. Frá Nova?

Ekki fæ ég séð að þetta sé fyrir mínum texta eða trufli mína síðu á neinn hátt og tel ekkert nema eðlilegt hjá forsvarsmönnum mbl.is að reyna að fá inn pening á bloggsíður sínar.

Ég nýti mér þjónustu þeirra frítt og finnst fullkomlega eðlilegt að þeir nýti sér heimsóknir á bloggsíður sínar til að selja auglýsingar.

 

Skaðinn er skeður

Það hefur verið athyglisvert að fylgjast með vandræðum sjálfstæðismanna í borginni. Hægt og rólega hefur flokknum tekist að missa alla tiltrú, bæði með framgöngu forystumannsins sem hefur gerst sekur um ótrúlegt dómgreindarleysi. Þessi reyndi stjórnmálamaður.

Eins hefur þögn sexmenningana ekki hjálpað. Greinilega tekin ákvörðun þar að bakka út og láta Villa taka skellinn.

Vilhjálmur hefur ekki marga kosti í stöðunni. Hann getur setið sem fastast, tekið við borgarstjórastólnum eftir ár en það mun verða Sjálfstæðisflokknum dýrkeypt.  Eins getur hann ákveðið að sitja áfram sem borgarfulltrúi en stíga niður sem leiðtogi. Það yrði ekki gott fyrir flokkinn, enda hefur Villi skaðast mikið á síðustu misserum. Mun meira eftir Kastljós þáttinn sem í rauninni gekk frá hans möguleikum á "comeback"  Í þriðja lagi getur hann ákveðið að hætta alveg.  Alveg sama hver niðurstaðan verður kemur flokkurinn virkilega skaddaður út úr þessu öllu saman.

En eru aðrir flokkar og borgarfulltrúar stikkfrí?  

Samfylkingin stærst allra flokka

Óttaleg vitleysa er þetta

Sá í dag frétt mbl.is um handboltaleik Stjörnunnar og ÍBV.  Fyrirsögnin segir svolítið mikið um fáránleika fréttamannsins. Hann hefur tekið afstöðu með varnarmanni Stjörnunnar sem hefur verið duglegur að benda á þetta atvik sem árás og þaðan af verra. Ég var að sjá þetta í fyrsta skipti í dag en hafði heyrt af þessu.

Miðað við lýsingarnar sem ég hafði heyrt, mest frá leikmanni Stjörnunnar þá slátraði leikmaður ÍBV honum og aldrei hef ég heyrt annað en þarna hafi verið um beina árás að ræða.

Eftir að hafa horft á þetta, aftur og aftur og aftur, get ég ekki séð þessa árás. Vissulega fær leikmaður Stjörnunnar högg í andlitið en að halda því fram að leikmaður ÍBV hafi vísvitandi slasað hann er þvílík firra.  Hvet fólk til að horfa á þetta.

Hafið þá í huga að þarna er línumaður ÍBV að spila fyrir utan, ekki beint staða sem hann er vanur að spila en ÍBV er einum færri á þessum tímapunkti. Hann tekur gabbhreyfingu og rekur olnbogann í andlit varnarmannsins um leið og hann kemst fram hjá honum.

Horfið líka á viðbrögðin á bekknum hjá Stjörnunni.  Engin viðbrögð.

Ég er reyndar sammála því að það ætti að vera hægt að dæma eftir myndbandsupptökum. Það er eðlilegt í nútíma handbolta. 

En hefði ekki verið eðlileg blaðamennska að leita viðbragða leikmannsins sem á þarna í hlut, í staðinn fyrir að hlusta einhliða á mál Stjörnuleikmannsins. Hann er meira að segja með myndband af þessu á Youtube.  

Finn til með honum, hann slasast þarna illa en er þetta ekki eitthvað sem getur gerst í handbolta. Þetta er íþrótt þar sem harkan er í fyrirrúmi og mörg "kjaftshöggin" í hverjum leik.  

Lögleg brot ef enginn sér?

Breytingar á bloggi

Ég var orðinn þreyttur á gamla lúkkinu. Ákvað að breyta til. Fannst þetta ágætis tímapunktur. Við hjónin vorum að eignast okkar þriðja barn og ég að verða faðir í fjórða sinn. Við vorum af þeim sökum í Reykjavík alla síðustu viku.

Peyjinn sem kom í heiminn þann 5. febrúar var 12 merkur og 50 cm. Lítill en ákveðinn... eins og mamman

Við vorum búin að ákveða að fara heim á laugardaginn síðasta. Ég með Herjólfi um kvöldið þar sem við vorum á bíl og hún með flugi seinnipartinn.  Eftir stórviðrið á föstudaginn var ákveðið að fella niður báðar ferðir Herjólfs. Þannig að ég komst ekki með bílinn en við komumst öll heim með flugi. 

Hef verið að velta fyrir mér hvort eitthvað hafi breyst í ákvörðunartökum varðandi Herjólf? Nú var tekin ákvörðun um það á föstudaginn að fresta báðum ferðunum á laugardag. Var sú ákvörðun tekin eftir veðurspá en svo var flugfært allan daginn.  Ég geri mér grein fyrir því að sjórinn er oft lengi að jafna sig eftir slík stórviðri og kannski var þetta hárrétt ákvörðun.

En ég spyr mig, hefur kröfunum verið breytt eitthvað?  Mér finnst ferðir falla mun oftar niður nú en áður.  Er búið að herða á reglunum, treysta þeir skipinu ekki eins vel, er erfiðara að komast inn í Þorlákshöfn nú en áður eða hvað?

Læt hér fylgja mynd af nýjasta fjölskyldumeðliminum...

ps - breytt útlit hefur ekkert með gengi Liverpool að gera...